Nær 300 utøvarar frå 21 land møttest til dyst på Storefjell Resort sist helg.
Nær 300 utøvarar frå 21 land møttest til dyst på Storefjell Resort sist helg.

Helga då topptrente turistar fylte Storefjell

Storefjell Resort er i ferd med å etablere ein ny, og sprek, form for turisme på Golsfjellet.

Crossfit: Energisk musikk pumpar ut gjennom høgtalarane medan utøvarane gjer lagøvingar både synkront og på tid. Lufta i messehallen på Storefjell Resort smakar ei blanding av sveitte og kalk.

Tøff treningsform

– Det har vore bra så langt. Me starta helga med å ta ein løpetur ute i fjellet medan sola gjekk ned, smiler Marc Fugger.

Artikkelen held fram under annonsen.

Han har kome heile vegen frå Tyskland for å delta i helgas konkurranse på Golsfjellet.

– Det er ein vakker plass, dette. Landskapet kan minne litt om Alpane i Sveits. Då eg fyrst fekk høyre ideen om å arrangere konkurranse på fjellet i Norge, noterte eg det i kalenderen med ein gong.

Fugger er til dagleg i Forsvaret heime i Tyskland. Han kan borti crossfit då han for fem år sidan var på jakt etter ei ny treningsform. Som crossfit-utøvar kjem ein borti litt av «alt». Såleis blir ein raskt sterk både fysisk og mentalt.

– Det fine med sporten er jo nettopp det at ein kan skalere øktene etter eige nivå, seier Marc Fugger frå Tyskland.
– Det fine med sporten er jo nettopp det at ein kan skalere øktene etter eige nivå, seier Marc Fugger frå Tyskland.
Utøvarane lyftar vekta, ein eller to «kettlebells», opp og over hovudet. Ei avansert fullkropps-øving, der ein trenar alt frå grep til rygg, skuldrer og kjernemuskulatur.
Utøvarane lyftar vekta, ein eller to «kettlebells», opp og over hovudet. Ei avansert fullkropps-øving, der ein trenar alt frå grep til rygg, skuldrer og kjernemuskulatur.
Utøvarane ligg strøydd etter gjennomført konkurranse.
Utøvarane ligg strøydd etter gjennomført konkurranse.
I crossfit gjer ein mange øvingar berre med kroppsvekt, men også med ulike vekter som til dømes kettlebells.
I crossfit gjer ein mange øvingar berre med kroppsvekt, men også med ulike vekter som til dømes kettlebells.

– Ikkje minst er miljøet og samhaldet i sporten bra for sjela, meiner han.

Crossfit vart etablert som treningsform kring år 2000, og har sidan då vorte stadig meir populært verda over. Men det finst også ei rekkje motforestillingar mot crossfit. Ved fyrste augekast er det nemleg lett å tru at ein må vera ein urokkeleg «maskin» for å takle øvingane.

– Eg pratar ofte med folk som synest crossfit nærmast verkar litt skummelt. Men det fine med sporten er jo nettopp det at ein kan skalere øktene etter eige nivå. Slik kan ein erfaren utøvar og ein nybegynnar gjennomføre akkurat den same økta, seier han.

Verdstoppen

Fugger er ein av drygt 270 utøvarar frå 21 nasjonar som kjempar mot kvarandre i Norwegian Throwdown. Crossfit-konkurransen er Skandinavias største i sitt slag. Utøvarane konkurrerer på ulike nivå og i ulike konstellasjonar – individuelt, eller i lag på to eller fire. I løpet av helga vart dei vurdert basert på ulike «events», eller treningsøkter. Øktene har element frå både styrketrening, kondisjonstrening og turn.

– Crossfit er styrketrening under kontroll. Det er ikkje om å gjere å pumpe seg i hel. Ein kan forme øktene ut ifrå både styrke og kor god ein er. Til dømes ved å bruke lettare eller tyngre vekter, eller å gå opp eller ned i talet på repetisjonar, seier Roger Gillros, dagleg leiar i Aktivitet Norge.

Artikkelen held fram under annonsen.

Frå Oslo til Storefjell

Aktivitet Norge og samarbeidspartnarane har med seg i alt 65 personar for å få logistikken kring konkurransen til å gå opp. Gillros har god erfaring med å arrangere liknande konkurransar og arrangement i Oslo-området. Men då han i 2016 sat blant publikum under Strongman-konkurransen på Store- fjell, fekk han blod på tann.

– Noko av det fine med å arrangere konkurranse på Storefjell er at me får plass til alt og alle under same tak, seier han. – Det er veldig enkelt å arrangere konkurransar i Oslo. Men dette er unikt. Me ser heilt klart større interesse knytt til dette arrangementet, særleg frå utanlandske utøvarar. Somme tek dette som ein ferie, og har vore her ei veke alt, legg han til.

Omfamnar treningsturismen

Og valet av lokale har vekt interesse. Såpass mykje at også Crossfit Inc har peikt ut Aktivitet Norge og Storefjell som ny kvalifiseringsstad til VM. I februar kjem Gillros og gjengen tilbake til Storefjell for å arrangere Norwegian Crossfit Championship. Der kan utøvarane kvalifisere seg til Crossfit Games, eller VM i Crossfit, som ein av 22 stader i verda.

– Me har hatt både Strongman og NM i styrkeløft på Storefjell tidlegare. Men aldri noko som dette. Utøvarane fekk ei tøff oppleving med fjellet fyrste dagen, då dei skulle ut og springe i sidevegs regn og elles røffe forhold. Men dei er robuste folk, så dei toler det nok, seier Andreas Nibstad, ved Storefjell Resort.

– Korleis er det å ha hotellet fullt med nær 300 treningsfolk?

– Det er absolutt god stemning, og praten går lett. Og så et dei mykje mat, flirer Nibstad.